धनगढी / सुदूरपश्चिम प्रदेशका आर्थिक मामिलामन्त्री चक्रबहादुर मल्लले प्रदेशको समृद्धिलाई साझा विषय बनाएर सबै पक्ष मिलेर अघि बढ्नुपर्ने बताएका छन्।
सुदूरपश्चिममा मनाइने ओल्के, नागपञ्चमी र गुरही पर्वको अवसरमा धनगढीमा आयोजित शुभकामना आदानप्रदान कार्यक्रममा मन्त्री मल्लले प्रदेशको समृद्धिसँग सबै नागरिकको प्रतिष्ठा जोडिएकाले विकासका लागि साझा प्रयास आवश्यक रहेको बताए।
उनले सामाजिक तथा धार्मिक सम्पदाको संरक्षण र समग्र विकासलाई प्रदेश समृद्धिको आधारका रूपमा लिनुपर्ने उल्लेख गर्दै सरकारले नयाँ सोचका साथ काम गर्ने बताए।
मन्त्री मल्लले यसअघि बजेट निर्माणका क्रममा देखिएको विवादकै कारण नयाँ गठबन्धन र सरकार बनेको भन्दै अबको बजेट प्रदेशको समृद्धिको स्पष्ट खाका कोर्ने गरी निर्माण र कार्यान्वयन गरिने बताए।
कार्यक्रममा निवर्तमान भूमि व्यवस्था, कृषि तथा सहकारीमन्त्री वीरबहादुर थापाले यसअघि सरकारले ल्याएको बजेटप्रति असहमति जनाएकै कारण नयाँ गठबन्धन सरकार बनेको भन्दै विगतका कमजोरीबाट पाठ सिक्न आग्रह गरे।
उनले नयाँ सरकारले बजेट निर्माण गर्दा विगतका असहमति र समस्यालाई ध्यानमा राख्दै सुधारको स्पष्ट खाका समेट्नुपर्ने बताए।
कार्यक्रममा सहभागीहरूले ओल्के, नागपञ्चमी र गुरही पर्वको शुभकामना आदानप्रदान गर्दै नयाँ सरकारले सबै पक्षको भावना समेटेर काम गर्ने विश्वास व्यक्त गरेका थिए।
